Barnelege deltek på Forsker grand prix

Barnelege ved  barneavdelinga på Førde sentralsjukehus Hege Kristiansen deltek på årets Forsker grand prix, som vert arrangert i samband med Forskingsdagane.

Trykk her for å sjå klippet.

Som barnelege behandlar Kristiansen barn med fedme og overvekt. I Norge utviklar kvart femte barn overvekt eller fedme. Kvifor skjer det? Ser dei for mykje fjernsyn og er for lite aktive? Kan det vere at barna som er trassige og sinte utviklar dårlegare etevanar enn dei som er blide og fornøgde? Er foreldra for snille, eller kanskje for strenge?

Tidlegare studiar har funne overraskande liten samanheng mellom fysisk aktivitet og vektutvikling. Kan årsaka vere at ein har brukt kroppsmasseindeks som metode for å måle overvekt?

I Forsker grand prix vil Hege fortelje meir om desse problemstillingane. Ho er doktorgrandsstipendiat ved Klinisk institutt 2 ved Universitetet i Bergen.

Kva er Forsker grand prix:

Forsker grand prix er ein lystbetont formidlingskonkurranse for doktorgradskandidatar, der stipendiatane vert utfordra til å presentere forskinga si på ein lettfatteleg måte.

Deltakarane er godt i gang med doktorgradsarbeidet sitt, men har endå ikkje disputert. Dei får profesjonell hjelp både til stemmebruk, sceneopptreden og presentasjon i arbeidet fram mot dei regionale finalane.

Det vert arrangert regionale finalar i Bergen, Trondheim, Oslo og Stavanger, der dei to beste formidlarane vert kåra. Vinnarane i dei regionale finalane møtest til ein nasjonal finale der noregs beste forskingsformidlar vert kåra. Finalen er i år 1.oktober i Bergen.