Leiarar har eit stort ansvar for å dyrke fram det beste i dei tilsette, til beste for dei som treng hjelp, meiner Olina Kolbotn

Rom for utanomsnakket
Det er over ein kaffikopp noko av det viktigaste skjer. På personalmøtet får travle pleiarar og sakshandsamarar høve til å snakke om jobben dei gjer.

Ein god leiar let vere å stille med ein stram og ferdigsnikra dagsorden, for det er i utanomsnakket dei små observasjonane kan spire. Det er der finurlege, små forslag kan springe ut.

Effektivitet og ordstyring kan på si side verke kvelande. Skal ein halde seg til saka, går ein kanskje glipp av eit glitrande forslag frå den mest lågmælte i staben.

– Viss det ikkje er rom for refleksjonar, eller for at folk kan ta ordet spontant, gir det òg svært stor makt til ho som har kalla inn og leier møtet, seier Kollbotn.

Les heile saken her

 

I går var dei fire dekanane på dei nye fakulteta i HVL tilsett i styremøte. Randi Skår som er dekan på Avdeling på helsefag ved tidlegare Høgskulen i Sogn og Fjordane er no tilsett som dekan for det nye fakultetet for helse- og sosialfag ved Høgskulen på Vestlandet. Senter for helseforsking gratulerer med tilsettinga!

Link til sak på HVL

Endeleg namn på dei fire fakuleta vert vedtatt i styremøte 15.juni

No skal det verte lettare for deg som pasient å påverke ditt eige behandlingsopplegg. Helse Førde, Høgskulen på Vestlandet (HVL) ved Campus Førde og Førde kommune forskar i fellesskap på korleis digital kommunikasjon hjelper til med dette. Dei tek pasienten sine tilbakemeldingar på større alvor, og Norges forskingsråd løyver dei 10 millionar kroner raust på kjøpet.

Skreve av: Hans Jakob Reite, HVL 

Forskingsgruppeleiar professor Christan Moltu ved Helse Førde og HVL framhevar at samarbeidet mellom dei tre institusjonane er avgjerande for å utløyse den gledelege løyvinga. For første gong når eit prosjekt utvikla i helseforskingsmiljøet i Førde opp i kampen om tildelingar frå Norges forskingsråd.

Psykisk helse, fedme og fastlege

Mange sterke fagmiljø har funne kvarande gjennom utarbeiding av prosjektet. NORSE er eit aktivt lærande elektronisk sjølvrapporteringssystem der pasientar melder frå om korleis dei opplever behandlinga innan psykisk helsevern. Ved hjelp av NORSE-systemet samarbeider no fagmiljøa innan psykisk helse, fedme og livsstil med fastlegane. Dei utviklar eit felles språk for korleis  tilbakemeldingar frå pasient skal få innverknad på behandlingsgrunnlaget.

 Forenkla pasientspråk framfor diagnosespråk

Det vert lagt vekt på at pasienten sine tankar og kjensler omkring heile situasjonen skal kome tydelegare fram. Systema skal tilpassast personen slik at det vert lettare å hjelpe dei som treng det. Her vert opplysningar om sinn og kropp kopla saman med korleis pasienten oppfattar seg sjølv i samspel med pårørande og andre viktige tilhøve.

Samarbeid og eigeninnsats

Dei tre lokale institusjonane samarbeider godt seg imellom. I tillegg står St. Olavs Hospital i Trondheim og Universitetet i Bergen på prosjektlista saman med internasjonale forskingspartnarar. For å få tilslag på ein så stor søknad er det avgjerande å stille med stor eigeninnsats i form av kompetent arbeidskraft. Mykje godt arbeid er nedfelt i søknaden. No startar vidareutviklinga av sjølvrapporteringssystemet for alvor.

Fakta om prosjektet

Prosjektet har fått tittelen: NORSE: Building bridges between psyche and soma through personalized and dynamic mental health systems. Midlane kjem frå det nye programma hjå Noregs forskningsråd: Gode og effektive helse-, omsorgs- og velferdstenester – HELSEVEL. Det var 58 søknadar, og NORSE er ein av seks som vart innvilga. I midlane ligg det ei koordinatorstilling, ei postdoktor-stilling og forsker resurssar.

Liggesår, infeksjonar, fall: Dette er nokre av farane pasientar er utsette for på sjukehus. Ei gruppe sjukepleiarstudentar frå HVL har jobba med ein metode for å gjere opphaldet tryggare.

Tekst: Katrine Sele

”Tavlemøte” er namnet på tiltaket som fire studentar ved sjukepleieutdanninga i Førde har vore ansvarlege for å innføre. I løpet av praksistida si på medisinsk sengepost på Førde sentralsjukehus, har dei gjennom dette vore med på å systematisere arbeidet ved avdelinga, slik at opphaldet der vil føre til langt mindre risiko for pasientane.

Kvar dag i seks veker har studentane leia møte for dei tilsette innanfor alle fagkategoriar: sjukepleiarar, legar, fysioterapeutar og ergoterapeuter. Under møta har dei gått systematisk gjennom ei rekkje risikofaktorar, og sjekka av korleis det ligg an for kvar pasient.

Motverkar unødig skade og liding

– Som andreårsstudent i sjukepleie var det skummelt å stå og leie eit møte framfor alle desse røynde fagfolka. Eg hadde høg puls! seier Vebjørn Dolve.

– Vi skjønar jo at forandring er vanskeleg for folk. Med desse møta fekk dei endå ein ting å tenkje på i arbeidskvardagen sin, og dei følte uro over at det kunne ta vekk tid med pasientane, seier Even Hallingstad.

– Likevel følte vi at dei var veldig mottakelege for dette nye tiltaket, og såg nytta av det. Så det var flott å jobbe med dei, seier Dolve.

Pasienttryggleik har vore eit stort tema innan norsk helsevesen dei siste åra. Gjennom pasientsikkerheitsprogrammet satsar helsestyresmaktene på å betre tryggleiken på norske sjukehus, sjukeheimar og andre helseinstitusjonar gjennom å innføre ulike tiltakspakker. Tavlemøte er eitt av fleire verkemiddel som skal gjere arbeidet med pasientar meir systematisk og oversiktleg.

For det å ligge på sjukehus er farleg i seg sjølv – i 2011 viste statistikken at heile 16 prosent av dei som var innlagde, blei påført unødig skade. Sidan har denne statistikken gått ned som følgje av kvalitetsarbeid, men ennå er det mykje att å gjere på feltet. Typiske problem kjem av mangel på rutine. Veneflon eller kateter kan bli verande i for lenge, og skape infeksjonsfare. Manglande merksemd kring ernæring eller liggestilling kan føre til unødig skade og liding. Tidlegare har oppfølginga av desse felta typisk vore lite systematiserte, dermed har risiko for skade som følge av dette vore stor.

Samarbeid mellom skule og helseføretak

Tavlemøte har vore innført ved nokre få avdelingar ved Førde sentralsjukehus, men langt ifrå alle. Det nye i dette tilfellet er at studentar har vore ansvarlege for innføre rutinen. Marny Alice Pettersen, fagutviklingssjukepleiar ved medisinsk avdeling, har leia prosjektet i lag med Irene Aasen Andersen og Sissel Hjelle Øygard, høgskulelektorar ved HVL. Saman søkte dei samarbeidsmidlar, slik at Helse Førde og HVL i lag kunne gjennomføre tiltaket i pasienttryggleik.

I tillegg til dei fire studentane frå andreåret ved sjukepleiarutdanninga i Førde, var tre studentar frå tredjeåret også involverte – med utgangspunkt i tavlemøta, skreiv dei ei oppgåve om kvalitetsarbeid i sjukepleie. Tankegangen kring kvalitetsarbeid er svært viktig å få innpoda under utdanninga – at sjukepleiarar heile tida må jobbe med å finne betre måtar å arbeide på. Alle praksisstudentane fekk oppleve at dei alt frå første stund dei kjem innafor ein helseinstitusjon, kan vere med på å setje sitt preg på korleis ting blir gjort.

– Gode rutinar er ein svært viktig del av god sjukepleie. Kring ein enkelt pasient er det utruleg mange fagfolk som samarbeider om pleia – gjerne fleire titals. Svikt i kommunikasjonen mellom ulike faggrupper kan få alvorlege konsekvensar, seier Irene Aasen Andersen.

Ein plan for kvar pasient

Berre det å planlegge utskriving av ei pasient, er ei omfattande oppgåve i seg sjølv. Mykje kan gå gale om ikkje dei rette fagfolka er involverte. I tilfelle der pasienten skal vidare til ein annan institusjon, er det mykje kunnskap som skal vere med vidare. Systematisk arbeid med tryggleik vil kaste av seg mykje: under arbeidet med å avdekke risiko, vil det vere mogleg å utvikle ein plan for den enkelte pasienten som følgjer han vidare til neste institusjon.

Gjennom å jobbe med tavlemøta synst praksisstudent Even Hallingstad at han fekk god innsikt i korleis ei avdeling fungerer:

– I sjukepleie er det mykje som bli gjort intuitivt, og det kan vere vanskeleg for ein som er ny i faget å forstå kva som må gjerast. Gjennom at ting i møte blir sagt høgt og sett fokus på, har vi eit mykje betre system for å vite kva kvarandre gjer, og det hjelper utruleg mykje, seier han.