Pust Deg Bedre er det første innovasjonsprosjektet i Helse Førde som får prosessrettleiing frå InnoMed. Målet er å bredde appen til kommunehelsetenesta, slik at pasientane får tilbodet tidleg.

– Rettleiinga vil bety mykje for oss. Denne prosessen er ukjend og marka er i stor grad upløgd. Vi har ein stor og spennande jobb framfor oss.

Det seier spesialfysioterapeut, idéhavar og prosjektleiar Elin Johnsen i Helse Førde. Sidan våren 2018 har ho jobba med dette innovasjonsprosjektet. Appen, som blei lansert i 2020, visualiserer pusteteknikkar for lungesjuke slik at dei klarar å kvitte seg med slim i luftvegane og dempe andenød.

Startar lokalt
No har prosjektet fått innvilga støtte til prosessrettleiing frå InnoMed, eit nasjonalt kompetansenettverk for behovsdrive innovasjon innan helsesektoren. Dei skal bidra med støtte i arbeidet med å bredde appen til kommunale fysioterapeutar og anna helsepersonell som er tett på pasientgruppa. Prosjektet fekk nyleg innvilga interne innovasjonsmidlar frå Helse Førde til dette arbeidet.

Breddinga skal skje i samarbeid med Vestlandsprosjektet, som jobbar med digital heimeoppfølging på tvers av kommunane i Vestland, Helse Bergen HF og Helse Førde HF.

Arbeidet startar allereie no i april i Helse Førde sitt nedslagsfelt med ein pilot for korleis ein skal samarbeide på tvers av spesialist- og kommunehelsetenesta. Dette kan kommunar på tvers av landet ha nytte av.

Lettar kvardagen
Dette er gode nyheiter for dei rundt 400 000 i Norge med ei form for lungesjukdom.

– Vi har ambisjonar om at vi i løpet av hausten er i gong med å implementere Pust Deg Betre i kommunar på vestlandet, og håpar at lungesjuke på den måten skal få hjelp på eit tidlegare stadium, seier Johnsen.

Pusteteknikkar på mobilen
Appen hjelper pasientane å forstå pusteteknikkar som kan vere vanskeleg å hugse om ein berre får dei forklart i møte med fysioterapeut. Pasientane har behandlingsplanen sin lett tilgjengeleg på mobilen når dei skal utføre teknikkane.

Appen er utvikla av Helse Førde i samarbeid med teknologiselskapet Haptiq. Utviklinga har skjedd i tett samarbeid med spesialister på lungefysioterapi, kommunale fysioterapeutar, Landsforeningen for hjerte og lungesyke (LHL) og eksterne leverandørar. Appen har fått økonomiske bidrag frå Helse Vest, Helse Førde og Stiftelsen Dam.

Appen er gratis og kan lastes ned i App Store og Google Play. (NB! Løysinga er akkurat nå avpublisert på grunn av ei midlertidig oppdatering.

 

Dronar som fraktar blodprøvar og medisinsk utstyr er stadig nærare å bli ein realitet i Noreg.

Airlift Solutions sin nye drone, utvikla under innovasjonskontrakt med Helse Vest, gjekk gjennom ei første vellukka testflyging fredag 19. mars.

Dette skriv Dronemagasinet. Les heile artikkelen her.

Løysinga er designa for helsevesenet sine behov. Berre på Vestlandet blir det frakta over 1,6 millionar blod- og vevsprøvar til og frå sjukehus i året, i tillegg til ei stor mengde legemiddel, utstyr og materiale.

– Veldig lovande

Anne Kristin Kleiven, utviklingsdirektør i Helse Førde, ser på testen med begeistring.

– Dette er veldig lovande. Dronar kan vere del av framtidas logistikkløysing og gje effektiv og påliteleg levering. Dei kan vere spesielt nyttige i Sogn og Fjordane, med dei geografiske utfordringane vi har her, seier ho.

Deltakarar i prosjektet er Helse Førde HF, Helse Stavanger HF, Helse Fonna HF, Helse Bergen HF, Sjukehusapoteka Vest HF og Airlift Solutions AS.

Prosjektet starta i samarbeid med Helse Førde i 2018 og Helse Førde er prosjektkoordinator for helseføretaka, som er pilotkundar. Airlift Solutions leier droneprosjektet, og utviklar og piloterer løysinga saman med helseføretaka i Helse Vest.

Interne midlar på til saman 550 000 kroner er no delt ut til seks innovative prosjekt.

I år har seksjon for forsking og innovasjon hatt høve til å lyse ut interne midlar til nyskapande arbeid. Formålet med midlane er å stimulere til auka innovasjonaktivitet. Alle tilsette i Helse Førde med eit pågåande innovasjonsprosjekt, eller ein god idé til nyskapande arbeid, kunne søke.

Helse Førde er opptatt av innovasjon, og innovasjonsrådgjevarane bidreg gjerne med å rettleie og hjelpe fram gode idear og prosjekt. Trykk her for å sende inn din idé.

 

Her er prosjekta som fekk støtte:

Rehabilitering med nye auger – VR
110 000 kr

Søkjarane Jeanette Svarstad og Stine Solvik er spesialfysioterapeutar ved avdeling for samhandling og tverrprofesjonelle tenester i Helse Førde.

Prosjektet ønskjer å bruke VR-teknologi til opptrening av pasientar som har hatt hjerneslag. Ein har allereie hausta nokre erfaringar og ønskjer å vidareutvikle VR som arbeidsmetodikk for å kunne tilby det til fleire pasientar. Erfaringane så langt viser at å bruke VR i rehabilitering og opptrening har hatt stor nytte for både pasientane og dei som legg til rette for treninga.

Prosjektet har tidlegare fått såkornmidlar, og innovasjonsmidlane skal bidra til å implementere VR som ein del av drifta i avdelinga, lære opp fleire medarbeidarar og kjøpe inn utstyr.

 

Digital førarkortutredning
80 000 kr

Søkjar Andreas Håkansson er nevropsykolog ved avdeling for nevrologi, revmatologi og rehabilitering i Helse Førde.

Prosjektet har som mål å utvikle ein digital førarkorttest som vil heve kvaliteten på måten ein vurderer om pasientar er skikka til å behalde førarkortet. Den primære brukargruppa er pasientar med hjerneskade (slag, nevrodegenerative demensar). Testen vil ved hjelp av eit enkelt opplegg måle relevante visuo-kognitive funksjoner som ikkje blir målt i noverande praksis.

Håkansson utviklar testen i samarbeid med ingeniørstudentar på Høgskulen på Vestlandet, som gjer dette som ei bacheloroppgåve.

 

Akuttskrin anafylaksi
100 000 kr

Søkjar Kjersti Grinde er fagutviklingsjordmor ved kvinneklinikken i Helse Førde.

Prosjektet har utvikla ein prototype for eit standardisert akuttskrin som skal nyttast ved anafylaktisk sjokk. Prosjektleiar har gjennom klinisk arbeid erfart at det er behov for eit standardisert skrin, då dagens situasjon viser at skrina fins i mange ulike fargar, fasongar, og med ulikt innhald.

Grinde har vore i dialog med eit verktøykassefirma i Trøndelag, Fosen Tools, for å produsere to prototypar av skrinet. Grinde har også vore gjennom ei god forankring internt i Helse Førde og har presentert prosjektet både på avdelingar og i føretaksleiinga. Midlane skal brukast til frikjøp for å kunne vidareutvikle skrinet ytterlegare og implementere det i fleire avdelingar i Helse Førde. Dersom ein lukkast, kan ein også spreie det til andre føretak.

 

Painpad – pasientstyrt registrering og dokumentasjon av akutte smerter
110 000 kr

Søkjar Hans Jacob Westbye er anestesioverlege og medisinskfagleg rådgjevar for Nye Førde Sjukehus.

Prosjektet har som mål å gje pasientane medverknad i eiga behandling, og å utvikle og implementere ei teknisk løysing for automatisk registrering og dokumentasjon av opplevd smertenivå. Det er utvikla ein prototype som er ein digital versjon av smerteskalaen NRS-11 der pasientane kan trykke på tal frå 0-10 for å rapportere smertenivå.

Westbye har tidlegare også fått eksterne midlar frå Innovasjon Norge og Sparebanken Vest sitt næringsfond. Han er også i kontakt med masterstudentar ved Høgskulen på Vestlandet. Midlane skal brukast i fase 2 i prosjektet, der ein skal gjennomføre ei brukarundersøking og eit moglegheitsstudium.

 

Pust Deg Bedre – med fokus på saumlause overgangar på tvers av tenesteledd
100 000 kr

Søkjar Elin Johnsen er spesialfysioterapeut ved avdeling for samhandling og tverrprofesjonelle tenester i Helse Førde.

Søkjer har tidlegare fått midlar både frå Helse Vest og Helse Førde til å utvikle applikasjonen Pust Deg Bedre. No vart det søkt om midlar til å implementere og gjere kjent applikasjonen i kommunane for å styrke samhandlinga mellom spesialist –og primærhelsetenesta. Målet er å utvikle ein samhandlingskjede som skal styrke tilbodet om lungefysioterapi på tvers av tenesteledd.

 

Droner for effektivisering av Helse-Norge – visualiseringsdelen
50 000kr

Søkjar Benedicte S. Bendiksen er rådgjevar i fag –og utviklingsavdelinga, og koordinator for prosjektet Droner for effektivisering av Helse-Norge fase tre.

Prosjektet har vore gjennom to tidlegare fasar og er i fase tre organisert gjennom ein innovasjonskontrakt med Airlift Solutions, der alle føretaka i Helse Vest er pilotkundar.

Prosjektet er eit stort og viktig regionalt arbeid med brei forankring. Midlane skal gå til tenestedesign og visuell kommunikasjon.

 

Her kan du sjå video av fleire av prosjekta.

Helseinnovasjonskonferansen er ein årleg møteplass med mål om erfaringsutveksling og nettverksbygging på tvers av offentleg og privat sektor, for at vi saman skal kunne løyse utfordringar i helsesektoren.

Sjå opptak av hovudprogrammet frå konferansen her

 

Konferansen viktig for samarbeid

På konferansen møttest framoverlente bedrifter, helsearbeidarar og representantar frå utdanningssektoren.

– Det er viktig for Helse Førde å vise fram kva vi jobbar med. Arenaer for erfaringsutveksling og læring er vesentlege for framtidig samarbeid mellom helseføretaket og andre aktørar i vår region, seier Arve Varden, administrerande direktør i Helse Førde.

Profesjonell gjennomføring

Grunna koronasituasjonen blei konferansen gjennomført på ei digital plattform, og hovudprogrammet vart streama frå Førde. Konferansier Håkon Haugsbø leia 512 deltakarar gjennom eit variert program spekka av gode innlegg frå ulike kompetansemiljø i heile Noreg. På programmet stod også ein engasjerande paneldebatt der utfordringa var «kvifor er offentleg – privat samarbeid så vanskeleg?».

Blant dei mange interessante innleggshaldarane på programmet fann ein mellom anna Karen Dolva, som prata om korleis innovativ og framtidsretta tenking har prega hennar arbeid, og Gunn-Berit Neergård, som forskar på innovasjon med utgangspunkt i helsepersonell som innovativ ressurs. Prosjektleiar Annette Eri Norevik fortalde om det 3-årige programmet e-Helse Vestland, og leiar i IT utvalet til Legeforeininga, Kjartan Olafsson, snakka om teknologioptimisme med beina godt planta i klinisk kvardag. Innimellom fordraga vart det vist små filmsnuttar av innovasjonsarbeid Helse Førde deltek i.

 

Stor aktivitet

Dei mange aktive deltakarane fekk snakka saman både på video og chat i digitale minglerom, og møtte innovative bedrifter på digitale stands.

Statistikken syner at det var mykje aktivitet på konferanseplattformen i løpet av dagen: 4000 besøk på dei ulike standane, 100 deltakarar fekk med seg lunsjdebattane, og det var 110 ein-til-ein-kontaktar mellom deltakarane. 550 meldingar vart sende på kryss og tvers under konferanse. Dette svarar til ein 10 meter lang chat-tråd, dersom ein hadde printa den ut.

– Sidan vi denne gongen måtte køyre konferansen digitalt, var vi spente på korleis vi skulle oppnå målet med å bygge bru mellom fag og folk. Då er det ekstra stas å kunne oppsummere at deltakarane faktisk var aktive undervegs i konferansen, både på chat, i lunsjdebattane og på dei digitale standane, seier Gro Rukan, innovasjonsrådgjevar i Helse Førde.

Konferansen vart arrangert av Helse Førde, i samarbeid med Noregs Forskingsråd, Kunnskapsparken Vestland, Innovasjon Noreg, Sunnfjord Utvikling, NHO og Høgskulen på Vestlandet.